Carita Wayang II

Anoman Kridha

Saderengipun wangsul Anoman sumedya nodhi kakiyatanipun bala Alengka. Anoman kridha, taman dipunowat-awut, barang-barang saha rerengganing kraton dipunrisak. Wadya raseksa ngebyuk nyerang Anoman. Kathah ingkang dhawah, kabentus, klenger, tuwin pejah katrajang pangamuking Rewandaseta. Wadya danawa dipunkerigaken, kumaredeg mbujeng ngrabasa Anoman, Anoman kacepeng, kakecrek, saha kalarak ngadhep ing ngarsa nata. Anoman badhe kapidana pejah. Nanging lajeng mratelakaken bilih piyambakipun punika satunggaling utusaning nagari. Adhedhasar angering bawana utusaning nagari punika boten kenging kaprajaya, saha kedah dipunurmati. Saestu Anoman saged wilujeng. Nanging tetep kapatrapan paukuman. Buntutipun dipunblebet badhe dipuncelup lisah patra nunten kabesmi. Shinta miring pawartos bab kadadosan menika. Piyambakipun ndedonga dhumateng Dewa Latu murih Anoman boten kabesmi. Buntutipun Anoman dados obor makantar-kantar. Kapiseta nunten mlumpat nylangkrik ing sanginggiling payon, kaliyan ngobat-abitaken buntutipun. Boten dangu payoning kraton kobar. Lajeng mremen dhateng wewangunan-wewangunan, karton dalah isen-isenipun sami kawelagar. Latu ngalad-alad nyandhak griya nelasaken barang-barang sanesipun. Kraton Alengka dados karang abrit, dados seganten latu. Dene anoman waras-wiris seger buger boten kabesmi, ndedel ing angkasa tumunten kumleyang mangandhap njegur pinggiraning seganten. Para wanara rame surak gumuruh ambata rubuh mmapag wangsulanipun Palwagaseta. Nunten sesarengan wangsul dhateng Kiskendha manggihi Rama. Rama matur nuwun dhateng Anoman. Lajeng kados pundi samangke? Kados pundi anggenipun badhe mbidhalaken wadya bala nempuh Alengka? Papanipun kepalang seganten wiyar. Sugriwa ngedalaken pamanggih damel bendungan. Bendungan kabangun ing seganten tumuju Nagari Alengka. Anoman sarujuk. Bala wanara sami sagah. Sedaya ageng ing manah badhe saged njebol beteng Alengka. Atusan, ewon bala rewanda dipunkerigaken tumandang damel tambak. Rama minangka senopati perang. Kridhaning tantra wanara dipunmangertosi dening mengsah. Rahwana ngempalaken para pangageng dalah para ingkang pininjul ing perang. Golonging rembang badhe mbela raja nanggulangi kurdaning mengsah. Sadaya nayogyani, namung wonten satunggal ingkang boten, inggih punika Wibisana, adhinipun Rawana. Wibisana punika satriya luhur ing budi, piyambakipun botrn nayogyani wontenipun perang. Perang temtu damel kurba, ndhatengaken bencana, murugaken para kawula nandhang papa cintraka. Perang punika ngrisak katentreman dalah karaharjaning sesame. Punapa malih nyata menawi Alengka punika cidra, mbela dursila angkara murka. Rahwana punika dursila angkara murka nyahak hakipun tiyang sanes. Shinta punika hakipun Rama. Mila, kedah kawangsulaken dhateng Rama. Punika satuhu adil saha leres. Miring pratelanipun, Dasamuka duka, nguman-uman rayinipun. Wibisana dipunanggep meri, ugi kepengin nanging boten kuwagang. Bonten wonten margi sanesipun kajawi milih ingkang adil saha leres, punika diputebi dening Wibisana. Piyambakipun boten nyondhongi tumindakipun kangmasipun. Semparet, kangmasipun katilar, nagari Alengka katilar, esthinipun manggihi saha njurungi Rama. Wibisana ngandhemi ingkang adil, mbelani ingkang leres.